கொளத்தூர் தொகுதியின் தமிழக வெற்றிக் கழக சட்டமன்ற உறுப்பினராக இருந்து வந்தவர் வி.எஸ். பாபு. கடந்த சில மாதங்களாக உடல்நலக் குறைவால் பாதிக்கப்பட்டிருந்த இவர், செப்டம்பர் 9ஆம் தேதி அமைந்தகரையில் உள்ள எம்ஜிஎம் மருத்துவமனையில் அனுமதிக்கப்பட்டார்.

அங்கு நுரையீரல் தொற்றுக்காக சுமார் 70 நாட்களாகத் தீவிர சிகிச்சை பெற்று வந்த நிலையில், வியாழக்கிழமையான நேற்று திடீரென மாரடைப்பு ஏற்பட்டு உயிரிழந்தார். இதுதொடர்பாக மருத்துவமனை நிர்வாகமும் அதிகாரப்பூர்வ அறிக்கை வெளியிட்டது. இதையடுத்து, பெரம்பூரில் உள்ள அவரது இல்லத்தில் பொதுமக்கள் மற்றும் அரசியல் கட்சித் தலைவர்கள் அஞ்சலி செலுத்துவதற்காக உடல் வைக்கப்பட்டது. முதல்வர் விஜய், அமைச்சர்கள், எம்எல்ஏக்கள் மற்றும் பல்வேறு அரசியல் கட்சிகளின் முக்கிய நிர்வாகிகள் நேரில் சென்று அஞ்சலி செலுத்தினர்.

இந்நிலையில், வெள்ளிக்கிழமையான இன்று வி.எஸ். பாபுவின் இறுதிச் சடங்குகள் அவரது இல்லத்தில் நடைபெற்றன. இதனைத் தொடர்ந்து, அவரது உடலைத் தகனம் செய்வதற்காக அருகில் உள்ள மின் மயானத்துக்கு இறுதி ஊர்வலமாக எடுத்துச் செல்ல ஏற்பாடுகள் செய்யப்பட்டன. அப்போது வீட்டிலிருந்து பாபுவின் உடலை வெளியே கொண்டு வந்தவர்களுடன் முதல்வர் ஜோசப் விஜய்யும் இணைந்து, தானே முன்வந்து அவரது உடலைச் சுமந்து சென்றார். முதல்வரின் இந்தச் செயல் அங்கிருந்த கட்சியினரையும் பொதுமக்களையும் நெகிழ்ச்சியடையச் செய்தது. பின்னர் மலர்களால் அலங்கரிக்கப்பட்ட வாகனத்தில் வி.எஸ். பாபுவின் உடல் வைக்கப்பட்டு இறுதி ஊர்வலம் தொடங்கியது.

இந்த இறுதி ஊர்வலத்தில் முதல்வர் விஜய் மட்டுமின்றி, அமைச்சர்கள், சட்டமன்ற உறுப்பினர்கள் மற்றும் கூட்டணிக் கட்சிகளின் தலைவர்களும் பங்கேற்றனர். அனைவரும் இறுதி ஊர்வல வாகனத்தின் பின்னால் நடந்து சென்று மறைந்த எம்எல்ஏவுக்கு இறுதி மரியாதை செலுத்தினர். தனது கட்சியின் சட்டமன்ற உறுப்பினரின் மறைவையொட்டி முதல்வர் விஜய் நேரில் பங்கேற்றதுடன், அவரது உடலைச் சுமந்து சென்ற சம்பவம் தற்போது அரசியல் வட்டாரத்திலும் சமூக வலைதளங்களிலும் கவனம் பெற்று வருகிறது.

Leave a Reply

Your email address will not be published. Required fields are marked *