2027-ம் ஆண்டு நடைபெறவுள்ள ஏஎப்சி ஆசிய கோப்பை தொடருக்கு இந்திய யு-17 அணி தோல்வியின்றி தகுதி பெற்று வரலாற்று சாதனை படைத்துள்ளது. மலேசியாவின் கோலாலம்பூர் கால்பந்து மைதானத்தில் வெள்ளிக்கிழமை நடைபெற்ற குரூப் இ பிரிவின் கடைசி போட்டியில், மலேசியாவுக்கு எதிராக இந்திய அணி 0-0 என்ற கோல் கணக்கில் போட்டியை டிரா செய்தது.
இந்த டிராவின் மூலம் 4 போட்டிகளில் விளையாடிய இந்திய அணி 3 வெற்றி, ஒரு டிரா என 10 புள்ளிகளுடன் குரூப் இ பிரிவில் முதலிடத்தைப் பிடித்து தொடருக்குத் தகுதி பெற்றது. இத்தொடரில் இந்திய அணி தோல்வியடையாமல் தனது தகுதிச் சுற்றுப் பயணத்தை நிறைவு செய்துள்ளது குறிப்பிடத்தக்கது.
மலேசியாவுக்கு எதிரான பரபரப்பான ஆட்டம்
மலேசியாவுக்கு எதிராக நடைபெற்ற போட்டியில் இரு அணிகளும் தொடக்கம் முதலே தீவிரமாகப் போராடின. ஆட்டத்தின் 5-வது நிமிடத்திலேயே மலேசிய வீரர் நூர் ஹிஷாம் அடித்த பந்து கோல் போஸ்ட்டில் பட்டு வெளியேறியது. இதற்குப் பதிலடியாக இந்திய அணி வீரர் ராஜ் சிங் வஹெங்பாம் கோல் அடிக்கக் கிடைத்த வாய்ப்பைத் தவறவிட்டார்.
இரு அணிகளின் தடுப்பாட்ட வீரர்களும் சிறப்பாகச் செயல்பட்டதால் முதல் பாதி மற்றும் இரண்டாம் பாதியில் கோல் எதுவும் அடிக்கப்படவில்லை. இறுதியில் போட்டி 0-0 என டிரா ஆனதன் மூலம், தேவைப்பட்ட 1 புள்ளியைப் பெற்று இந்திய அணி ஆசிய கோப்பைக்கு முன்னேறியது.
இந்திய யு-17 அணி படைத்த புதிய சாதனை
குரூப் இ பிரிவில் இடம்பெற்றிருந்த இந்திய யு-17 அணி 4 போட்டிகளில் 10 புள்ளிகள் பெற்று முதலிடம் பிடித்தது. பாலஸ்தீன அணி 9 புள்ளிகளுடன் இரண்டாம் இடத்தையும், போட்டியை நடத்திய மலேசிய அணி 7 புள்ளிகளுடன் மூன்றாம் இடத்தையும் பிடித்தன. சிங்கப்பூர் மற்றும் குவாம் அணிகள் அடுத்தடுத்த இடங்களைப் பிடித்தன.
இந்த தகுதிச் சுற்றுத் தொடர் முழுவதும் இந்திய யு-17 அணி மொத்தம் 20 கோல்களை அடித்து அசத்தியுள்ளது. ஏஎப்சி யு-17 ஆசிய கோப்பை தகுதிச் சுற்று வரலாற்றில் இந்திய அணி அடித்த அதிகபட்ச கோல்கள் இதுவே ஆகும். அணித்தலைவர் டலால்முன் காங்தே அதிகபட்சமாக 7 கோல்களை அடித்து முதன்மை நாயகனாகத் திகழ்ந்தார். 9 வெவ்வேறு வீரர்கள் இத்தொடரில் கோல் அடித்து அணியின் கூட்டு முயற்சிக்கு வலு சேர்த்தனர்.
உலகக் கோப்பை போட்டிக்கான வாய்ப்பு
இந்திய அணி ஏஎப்சி யு-17 ஆசிய கோப்பை தொடருக்கு தகுதி பெறுவது இது 11-வது முறையாகும். மேலும், தொடர்ந்து இரண்டாவது முறையாக இத்தொடருக்கு இந்தியா தகுதி பெற்றுள்ளது. முன்னாள் சர்வதேச வீரர் மெஹ்ராஜுதீன் வாடூ பயிற்சியின் கீழ் செயல்படும் இந்திய யு-17 அணி சிறந்த ஆட்டத்தை வெளிப்படுத்தி வருகிறது.
அடுத்த ஆண்டு மே மாதம் உஸ்பெகிஸ்தானில் நடைபெறவுள்ள ஏஎப்சி யு-17 ஆசிய கோப்பை தொடரில் காலிறுதிச் சுற்றுக்கு முன்னேறும் அணிகள், 2027-ம் ஆண்டுக்கான ஃபீஃபா யு-17 உலகக் கோப்பை தொடருக்கு நேரடியாகத் தகுதி பெறும் என்பதால் இந்திய ரசிகர்களிடையே எதிர்பார்ப்பு அதிகரித்துள்ளது.
இதையும் படிக்க: இந்திய ஹாக்கி அணி நியூசிலாந்தை 3-2 என வீழ்த்தி தொடரில் அபார வெற்றி!
