தற்போதைய அரசியல் நகர்வுகளை உற்றுநோக்கும்போது, பாரதிய ஜனதா கட்சியின் முன்னாள் மாநிலத் தலைவரான அண்ணாமலை, 2031 ஆம் ஆண்டு வரை பொறுமையாகக் காத்திருக்கத் தயாராக இல்லை என்பது தெளிவாகத் தெரிகிறது. அரசியல் களத்தில் நீண்ட கால முடக்கம் தன் வளர்ச்சிக்கு முட்டுக்கட்டையாக மாறும் என்பதை அவர் நன்றாகவே உணர்ந்துள்ளார். இதனால், தமிழ்நாட்டில் விரைவில் நடைபெறவுள்ள ஐந்து தொகுதி இடைத்தேர்தலில் அவர் நேரடியாகக் களம் இறங்குவார் என்ற பலத்த எதிர்பார்ப்பு உருவாகியுள்ளது.
இடைத்தேர்தல் என்பது ஒரு கட்சியின் பலத்தை நிரூபிக்கவும், தொண்டர்களை உற்சாகப்படுத்தவும் கிடைத்த மிகச்சிறந்த வாய்ப்ப என்பதால், அண்ணாமலை இந்தத் தருணத்தை மிகச் சரியாகப் பயன்படுத்திக் கொள்ளத் திட்டமிட்டு வருகிறார்.
இந்த இடைத்தேர்தல் அண்ணாமலைக்கு மட்டுமல்லாமல், அவருடைய தீவிர ஆதரவாளர்களுக்கும் ஒரு பெரிய அக்னிப் பரீட்சையாக அமையப் போகிறது. அண்ணாமலை மட்டும் போட்டியிடாமல், அவருடைய தீவிர விசுவாசிகளும் இந்த ஐந்து தொகுதிகளிலும் களம் இறக்கப்படுவார்கள் என்று அரசியல் வட்டாரங்கள் தெரிவிக்கின்றன.
இதன் மூலம் தன் அணியின் பலத்தையும், மக்கள் மத்தியில் தனக்கு இருக்கும் செல்வாக்கையும் ஒரே நேரத்தில் நிரூபிக்க அவர் வியூகம் வகுக்கிறார். இடைத்தேர்தல் முடிவுகள் எப்படி இருந்தாலும், அது அடுத்தகட்ட அரசியல் நகர்வுகளுக்கான அடித்தளமாக மாறும் என்பதில் ஐயமில்லை.
இந்த அதிரடி முடிவு, தமிழக அரசியலில் தங்களின் இருப்பை ஆழமாகப் பதிய வைக்க நினைக்கும் அண்ணாமலை தரப்பின் மிக முக்கியமான அரசியல் பாய்ச்சலாகப் பார்க்கப்படுகிறது.
இடைத்தேர்தல் வியூகங்களைத் தொடர்ந்து, அண்ணாமலையின் ஒட்டுமொத்தப் பார்வையும் 2029 ஆம் ஆண்டு நடைபெறவுள்ள நாடாளுமன்றத் தேர்தலின் மீதுதான் பதிந்திருக்கிறது.
அந்தப் பொதுத்தேர்தலில் தமிழ்நாட்டில் ஒரு மாற்று மற்றும் வலுவான மூன்றாவது கூட்டணியை உருவாக்க அண்ணாமலை தீவிரமாகச் செயல்படுவார் என நம்பப்படுகிறது.
திராவிடக் கட்சிகளுக்கு மாற்றாக ஒரு பலமான அச்சை உருவாக்குவதே இவருடைய முதன்மை இலக்காகும். இதற்காகத் தமிழகத்தில் உள்ள முக்கியக் கட்சிகளைத் தன்பக்கம் இழுக்க இப்போதிருந்தே ரகசியப் பேச்சுவார்த்தைகளும், அரசியல் தூதுகளும் தாராளமாக அரங்கேறத் தொடங்கிவிட்டன.
அண்ணாமலையின் இந்த மெகா கூட்டணித் திட்டம், டெல்லி மேலிடத்தின் முழு ஆதரவோடு செயல்படுத்தப்பட உள்ளதாகத் தெரிகிறது.
அண்ணாமலை அமைக்கவுள்ள இந்த புதிய கூட்டணியில் நாம் தமிழர் கட்சியின் ஒருங்கிணைப்பாளர் சீமான், அம்மா மக்கள் முன்னேற்றக் கழகத்தின் டிடிவி தினகரன், பாட்டாளி மக்கள் கட்சியின் அன்புமணி ராமதாஸ் மற்றும் தேசிய முற்போக்கு திராவிட கழகம் ஆகிய கட்சிகள் இணைய அதிகப்படியான வாய்ப்புகள் உள்ளதாக அரசியல் விமர்சகர்கள் கணிக்கின்றனர்.
திராவிட அரசியல் சித்தாந்தத்திற்கு எதிராகத் தனிப் பாதை வகுக்கும் சீமானும், டெல்டா மற்றும் தென் மாவட்டங்களில் கணிசமான வாக்கு வங்கியை வைத்துள்ள டிடிவி தினகரனும் இந்தக் கூட்டணியில் இணைந்தால் அது மிகப்பெரிய அதிர்வலைகளை உருவாக்கும்.
அதேபோல் வட மாவட்டங்களில் செல்வாக்கு மிக்க அன்புமணியும், பாரம்பரிய வாக்கு வங்கியைக் கொண்ட தேமுதிகவும் இணையும் பட்சத்தில், இந்தத் தளம் பலமான மாற்றுக் சக்தியாக உருவெடுக்கும்.
மற்றொரு புறம், தமிழக அரசியல் களத்தில் மற்றுமொரு பெரும் சக்தியாக உருவெடுத்துள்ள நடிகர் விஜய்யின் தமிழக வெற்றிக் கழகத்தின் பக்கமும் புதிய கூட்டணிக் கணக்குகள் உதயமாகி வருகின்றன.
விஜய்யின் அரசியல் கொள்கைகள் மற்றும் மதச்சார்பற்ற அணுகுமுறை காரணமாக, அவருடைய பக்கத்தில் இடதுசாரி கட்சிகளான சிபிஐ மற்றும் சிபிஎம், விடுதலைச் சிறுத்தைகள் கட்சி , இந்திய யூனியன் முஸ்லிம் லீக் மற்றும் மறுமலர்ச்சி திராவிட முன்னேற்றக் கழகம் போன்ற கட்சிகள் தஞ்சம் புக வாய்ப்புகள் பிரகாசமாக உள்ளன.
இதுவரை திமுக மற்றும் பிற கூட்டணிகளில் நீடித்து வரும் இந்தக் கட்சிகள், விஜய்யின் புதிய எழுச்சியைப் பயன்படுத்தி தங்களின் அரசியல் எதிர்காலத்தை உறுதி செய்ய அவர் பக்கம் சாய்ந்தால் ஆச்சரியப்படுவதற்கில்லை. இது தமிழகத்தின் ஒட்டுமொத்த கூட்டணி அமைப்பையே தலைகீழாக மாற்றிவிடும்.
இந்த அதிரடி மாற்றங்களின் விளைவாக, தமிழகத்தின் பாரம்பரியப் பெருங்கட்சிகளான திமுகவும், அதிமுகவும் தங்களின் வழக்கமான கூட்டணிகளை இழந்து தனித்துவிடப்படும் சூழல் உருவாகலாம்.
சிறு கட்சிகளின் ஆதரவு இல்லாமல் இந்த இரு பெரும் திராவிடக் கட்சிகளும் தங்களின் சொந்த பலத்தில் மட்டுமே தேர்தலைச் சந்திக்க வேண்டிய கட்டாயத்திற்குத் தள்ளப்படுவர்.
அண்ணாமலையின் ஒரு கூட்டணி, விஜய்யின் மற்றொரு கூட்டணி என இரு பெரும் புதிய அச்சுகள் முளைக்கும்போது, வாக்குகள் பலவாறாகப் பிரியும் என்பதில் சந்தேகமில்லை.
இதனால் 2029 நாடாளுமன்றத் தேர்தல் மற்றும் அதன் தொடர்ச்சியான அரசியல் களம் முன்னெப்போதும் இல்லாத அளவுக்கு பரபரப்பாகவும், கணிக்க முடியாத தேர்தல் முடிவுகளைத் தரக்கூடியதாகவும் மாறப்போவது மட்டும் உறுதி.