தமிழக அரசியல் வரலாற்றில் மிக முக்கியமான ஒன்றாகக் கருதப்படும் 2026 சட்டமன்றப் பொதுத்தேர்தலுக்கான ஆயத்தப் பணிகள் முழுவீச்சில் நடைபெற்று வருகின்றன. ஆளுங்கட்சியை வீழ்த்தி மீண்டும் ஆட்சிக் கட்டிலில் அமர வேண்டும் என்ற உறுதியோடு களம் இறங்கியுள்ள அனைத்திந்திய அண்ணா திராவிட முன்னேற்றக் கழகம், தனது முதற்கட்ட வேட்பாளர் பட்டியலை அதிகாரப்பூர்வமாக வெளியிட்டுள்ளது. அக்கட்சியின் பொதுச்செயலாளரும், சட்டமன்ற எதிர்க்கட்சித் தலைவருமான எடப்பாடி கே. பழனிசாமி, கழக ஆட்சி மன்றக் குழுவின் பரிசீலனைக்குப் பிறகு இந்த முக்கிய அறிவிப்பை வெளியிட்டுள்ளார்.
அதிமுக வெளியிட்டுள்ள இந்தப் பட்டியலில் அக்கட்சியின் முன்னணித் தலைவர்கள் மற்றும் முன்னாள் அமைச்சர்கள் பலருக்கு அவர்கள் ஏற்கனவே வெற்றி பெற்ற செல்வாக்குமிக்க தொகுதிகளே மீண்டும் ஒதுக்கப்பட்டுள்ளது. கழகப் பொதுச்செயலாளர் எடப்பாடி கே. பழனிசாமி , தனது சொந்தத் தொகுதியான எடப்பாடியில் (86) மீண்டும் போட்டியிடுகிறார். அவரைத் தொடர்ந்து, கட்சியின் துணைப் பொதுச்செயலாளரும் முன்னாள் அமைச்சருமான கே.பி. முனுசாமி வேப்பனஹள்ளி (54) தொகுதியிலும், திண்டுக்கல் சி. சீனிவாசன் திண்டுக்கல் (132) தொகுதியிலும் போட்டியிட உள்ளனர்.
அதிமுகவின் கோட்டையாகக் கருதப்படும் மேற்கு மண்டலத்தில் முன்னாள் அமைச்சர்களான எஸ்.பி. வேலுமணி தொண்டாமுத்தூர் (119) தொகுதியிலும், பி. தங்கமணி குமாரபாளையம் (97) தொகுதியிலும் களம் காண்கின்றனர். அதேபோல், தென் மாவட்டங்களில் கட்சியின் பலத்தை நிரூபிக்க முன்னாள் அமைச்சர்கள் செல்லூர் கே. ராஜூ மதுரை மேற்கு (194) தொகுதியிலும், ஆர்.பி. உதயகுமார் திருமங்கலம் (196) தொகுதியிலும், கடம்பூர் சி. ராஜூ கோவில்பட்டி (218) தொகுதியிலும் நிறுத்தப்பட்டுள்ளனர்.
இந்த முதற்கட்டப் பட்டியலில் மொத்தம் 23 முக்கிய வேட்பாளர்களின் பெயர்கள் இடம்பெற்றுள்ளன. சென்னையைப் பொறுத்தவரை முன்னாள் அமைச்சர் டி. ஜெயக்குமார் ராயபுரம் (17) தொகுதியில் மீண்டும் போட்டியிடுகிறார். விழுப்புரம் மாவட்டத்தில் சி.வி. சண்முகம் மைலம் (71) தொகுதியிலும், டெல்டா மாவட்டங்களில் ஆர். காமராஜ் நன்னிலம் (169) மற்றும் ஓ.எஸ். மணியன் வேதாரண்யம் (165) தொகுதிகளிலும் போட்டியிடுகின்றனர்.
தர்மபுரி மாவட்டத்தில் கே.பி. அன்பழகன் பாலக்கோடு (57) தொகுதியிலும், புதுக்கோட்டை மாவட்டத்தில் டாக்டர் சி. விஜயபாஸ்கர் விராலிமலை (179) தொகுதியிலும் களம் இறக்கப்பட்டுள்ளனர். மேலும், முன்னாள் அமைச்சர்கள் கே.சி. வீரமணி ஜோலார்பேட்டை (49) தொகுதியிலும், எம்.ஆர். விஜயபாஸ்கர் கரூர் (135) தொகுதியிலும், கே.சி. கருப்பணன் பவானி (104) தொகுதியிலும் போட்டியிடுகின்றனர். அரியலூர் தொகுதியில் தாமரை எஸ். ராஜேந்திரனும், கலசாப்பாக்கம் தொகுதியில் அக்ரி எஸ்.எஸ். கிருஷ்ணமூர்த்தியும் வேட்பாளர்களாக அறிவிக்கப்பட்டுள்ளனர்.
அதிமுக தலைமை வெளியிட்டுள்ள இந்த முதல் பட்டியலில் பெரும்பாலும் அனுபவம் வாய்ந்த முன்னாள் அமைச்சர்களுக்கே முன்னுரிமை அளிக்கப்பட்டுள்ளது. வரும் ஏப்ரல் 23, 2026 அன்று நடைபெற உள்ள பொதுத்தேர்தலில், பலமான வேட்பாளர்களை நிறுத்துவதன் மூலம் ஆரம்பத்திலேயே ஒரு வெற்றிச் சூழலை உருவாக்க எடப்பாடி பழனிசாமி திட்டமிட்டுள்ளார். இந்த அறிவிப்பு அதிமுக தொண்டர்களிடையே பெரும் உற்சாகத்தை ஏற்படுத்தியுள்ளதுடன், மற்ற கட்சிகளையும் வேட்பாளர் தேர்வில் விரைவுபடுத்தத் தூண்டியுள்ளது.